Leháŋl wí kiŋháŋ líla škéhaŋhaŋke s’eléčheča. Watóhaŋl šna, wí kiŋ akáŋtaŋhaŋ, ogléška sabsápa yukȟé. Lená wašíčuiya “sunspots” eyápi. Uŋgnáhaŋšna lená líla čónala. Hékta waníyetu tóna k’uŋ héhaŋ, wí kiŋ ogléška waníča s’e hé. Éyaš leháŋl ogléška kiŋ akhé kaíčhaǧiŋ na enágna tȟaŋíŋ, na waná wí kiŋ wánuni yukȟé s’eléča.

Makȟá kiŋ letáŋhaŋ, tákuwe él éwauŋčhiŋpi kta he, naíŋš táku uŋkówažapi he? Takómni wí kiŋ líla otȟéhaŋ éyaš ogléška kiŋ lená kaíyuzeyataŋhaŋ takúku makȟá él yutȟókeča okíhi. Ogléška kiŋ lená líla waš’áke, na waŋží sáŋm tȟáŋka áye kiŋ ečhél wówaš’ake kiŋ kȟó ičháǧe.

Uŋgnáhaŋšna ogléška kiŋ lená waŋží napȟópe. Íčat’á napȟópe háŋtaŋš, tȟówaš’ake kiŋ kaówaŋčaya iyéyiŋ na wamákȟa kiŋ étkiya oȟ’áŋkȟoya yé. Na akáb, ogléška kiŋ lé Makȟá kiŋ étkiya étuŋwaŋ hé háŋtaŋš, wówaš’ake kiŋ íyečhana uŋkápȟapi kte. Léčhetu kta čháŋna, táku waŋ khilí waúŋktapi na táku waŋ wókȟokpȟeka waúŋktapi.

Táku waŋ khilí k’uŋ hé lé é: wí wówaš’ake kiŋ makȟá kiŋ iyápȟa čháŋšna, maȟpíya tȟaŋíŋ eyápi kiŋ káǧe. Héčhetu háŋtaŋš, hená haŋhépi háŋl tȟaŋíŋ kte: šá na tȟózi na ská na uŋgnáš tȟóša naíŋš zí naíŋš tȟó. Líla ówaŋyaŋg wašté, na líla wakȟáŋ. Ózaŋ tȟaŋkíŋkiŋyaŋ čha maȟpíya kiŋ iwáŋkab kamnímniyaŋ híŋ na owálwate s’e hé. Waŋláke háŋtaŋš, tóhaŋni éyaktuŋžiŋ kte šni. Nakúŋ tuwé eyá oyákapi na iyótaŋš naȟ’úŋ phičá keyápi, éyaš naháŋȟči hé slol’úŋyaŋpi ȟče šni. Wapásike kiŋ héčhena hé ipásipi.

Yuŋkȟáŋ táku waŋ wókȟokpȟeke k’uŋ hé lé é: wí wówaš’ake kiŋ lé wakȟáŋgli iyéčheča. Hó čha wí kiŋ lé tȟaŋgyá hiyúyiŋ na iyáuŋpȟapi háŋtaŋš, táku óta wakȟáŋgli úŋ íŋyaŋka čha našílya okíhi, iyótaŋš wakȟáŋgli mázayayala na haŋwí-káǧapi naíŋš tȟawókaške kiŋ! Áta khilíya wayúšičiŋ naíŋš wayútakunišni okíhi. Čha hé líla wóinapȟeke.

Hó éyaš, hé slol’úŋyaŋpi na waúŋktapi. Toháŋtu čha ečhétu kte kiŋ uŋkáyatapi uŋkókihipi šni, tkȟá lehíŋtagna uŋkígluwiŋyeyapi na takúku uŋyúwiŋyeyapi uŋkókihipi. Léčhuŋk’uŋpi waštéke éyaš wayúwiŋyeyapi k’uŋ hé mázaska líla óta aíkȟoyaka čha itȟáŋčhaŋ naíŋš oyáte kiŋ lílaȟčiŋ wičálapi šni. “Eháš mázaska óta uŋkáyusotapi uŋčhíŋpi šni,” eyápi éyaš wí wakȟáŋgli waŋží waúŋkičiyutákunipi šni kiŋháŋ, “Akšáka, uŋkígluwiŋyeyapi kiŋ wašté tkȟá,” eyá-haŋpi kte, héčhena ní úŋpi háŋtaŋ.

Éyaš héčhetu kte šni séče na uŋgnáš íŋše maȟpíya tȟáŋíŋ kiŋ ówaŋyaŋg wašté kte, na héčhegla. Héčhel wašté kte. Waŋláka yačhíŋ háŋtaŋhaŋš, toháŋl tȟaŋíŋ kte kiŋ slolyáyiŋ kte héčha. Čha lél lá oyákihi: www.spaceweather.com naíŋš www.spaceweatherlive.com. Hená aŋpétu iyóhila phiphíya yutȟókečapi na yutȟéčapi. Naíŋš Ité Wówapi él, South Dakota Aurora Notification Group ópȟanič’iya oyákihi.