Čhaŋwápeǧi-Wí 8 uŋ héhaŋ, Šagláša wíŋyaŋyatápi waŋ Queen Elizabeth II ečíyapi kiŋ hé wičhóni ékignake. Íŋyaŋ thípi waŋ Balmoral eyápi čha iyé tȟáwa na ižéhaŋ ektá thí yuŋkȟáŋ hél makȟá wičhóni ayúštaŋ.

Híŋhaŋni láȟčiŋ háŋl, khúš hiŋgníŋ na waákisniya kiŋ khiyéla awáŋyaŋkapi éyaš t’íŋ kta wayázaŋke s’eléčheča škhé. Héčha úŋ, thítakuye kiŋ enánataŋhaŋ waŋglág hípi. Íyečhana yuŋkȟáŋ wótȟaŋiŋ kiŋ yaótȟaŋiŋpi: wíŋyaŋyatápi kiŋ t’á kéyapi. Šagláša oyáte kiŋ wótȟaŋiŋ kiŋ lé waktápi škȟá óta tȟaŋság t’ápi.

Héčhena tuwé óta wíŋyaŋyatápi othí ektá ípi na wanáȟča na wówapi hél paháyela églepi. Líla wašíglapi tȟáŋka. Na akhé húŋȟ ítokȟapi šni naíŋš wíŋyaŋyatápi kiŋ é na thítakuye kiŋ waštélakapi šni čha uŋgnáš iyókphipi.

Éšeš, tuwé kiŋ iyúha ȟčiŋ wíŋyaŋyatápi Elizabeth theȟílapi šni séče éyaš tuwé líla čónala itȟókab wičhátȟuŋpi na héčhena ní úŋpi. Wíŋyaŋyatápi kiŋ waníyetu wikčémna napčíyuŋka sáŋm šákpe, t’á háŋl, čha líla káŋ. Na nakúŋ 1952 uŋ héhaŋ tȟoká maswátȟešlaka kiŋ uŋkhíyapi čha waníyetu wikčémna šakówiŋ heháŋyaŋ oákaŋke-othéȟika akáŋl yaŋká čha tuwé čónala hé itȟókab wakíksuyapi.

Aháŋkiktapi tȟáwa kiŋ tónačhaŋ ečhúŋpi. Čhaŋwógnaka tȟáwa kiŋ él ȟpáyiŋ na tȟóyate kiŋ óta ówečhiŋhaŋ waŋglág hiyáyapi. Makhíyutȟápi tóna heháŋyaŋ apȟé nážíŋpi! Na óta haŋópta na aŋpétu ópta ówečhiŋhaŋ apȟépi kiŋ él ópȟapi, ȟ’aŋhíhiya tȟokátakiya yápi éyaš.

Yuŋkȟáŋ wíŋyaŋyatápi kiŋ tȟa-wíčhaȟapi kiŋ ečhúŋpi k’uŋ héhaŋ, tuwé líla óta ípi. Míla Háŋska tȟuŋkášilayapi kiŋ é naháŋ itȟáŋčhaŋ óta él ópȟapi, hená makȟásitomniyaŋ úpi. Hél owáčhekiye-olówaŋ óta ahíyayapi wóčhekiye óta eyápi na tuwáwaka wóyaonihaŋ káǧapi. Hé iglúštaŋpi uŋ héhaŋ, owáčhekiye tȟáŋka etáŋhaŋ áyapi na owáčhekiye čík’ala waŋ ektá aípi. Hél akhé awáčhekiyapi na yuŋkȟáŋ hél ȟápi.

Elizabeth čhiŋkšítku tȟokápȟa Charles waná wičhášayatápi héčha čha letáŋhaŋ wí tóna kiŋháŋ iyé maswátȟešlaka kiŋ uŋkhíyapi kte. Lehíŋtagna, tókheškhe yuwíŋyeyapi na iglúwiŋyeya kte. Waná waníyetu wikčémna šakówiŋ sáŋm yámni, na lé líla waníyetu óta apȟé úŋ-he. Yuŋkȟáŋ iyé t’é kiŋháŋ, čhiŋkšítku tȟokápȟa Prince William ečíyapi kiŋ hé iyé wičhášayatápi kiŋ é kte. Na héčheš wičhóȟ’aŋ kiŋ lé tȟokátakiya wičhóičhaǧe iyóptapta yeyíŋ kte.