Wípazukȟa-Wašté-Wí 24, 2022

Tȟuŋkášilayapi Owáyasu Waŋkátuya kiŋ Roe v. Wade eyápi k’uŋ hé phiyá akhíyapi yuŋkȟáŋ waná uŋmá ečhétkiya yasúpi. 1973 uŋ héhaŋ, Tȟuŋkášilayapi Owáyasu Waŋkátuya k’uŋ heyápi ektá Míla Háŋska Wóopȟe Wówapi kiŋ ogná, hoksíhiyuyekhiyápi kiŋ hé wíŋyaŋ tȟa wóiyowažapi na wičhákhi phičá šni kéyapi. Tkȟá waná hé héčhetu šni kéyapi. Héčheš wóiyowaža k’uŋ hé pažúžupi.

Wayásu wičháša na wíŋyaŋ kiŋ záptaŋ héčhel wóštaŋpi na uŋmá tópa kiŋ íŋš héčhetulapi šni. Léčha úŋ, waná wóopȟe kiŋ héčhena tȟókeča na Míla Háŋska makȟópašpe okhíse kiníl ektákta, hokšíhiyuyekhiyápi kiŋ wáŋčagna inážiŋ kte. Naháŋ wóanapte kiŋ lená haŋkéya sáŋm iyáyiŋ kta načhéče.

Wóštaŋpi kiŋ lé úŋ, “ȟupáhu išláyataŋhaŋ” ópȟa kiŋ óta iyúškiŋpi naháŋ “ȟupáhu čhatkáyataŋhaŋ” ópȟa kiŋ óta čhaŋtéšičapi. Tȟokáhe uŋ hená óta Waníkiya Wičála héčhapi na léčhel waéyapi; “Waná heháŋyaŋ wíŋyaŋ kiŋ hokšíčala wičhákiktepi okíhipi kte šni.” Éyaš ičínuŋpa uŋ hená óta léčhel iyókšilya waéyapi; “Ikpígnakapila kiŋháŋ hokšíčala héčha šni na wóštaŋpi kiŋ lé úŋ etáŋhaŋ wíŋyaŋ kiŋ iyúha wóiyowaža waŋkátuya ȟča waŋ gnúnipi.

Takómni tuwé k’éyaš leháŋl ptaŋyétu étkiya étuŋwaŋpi, ičhíŋ heháŋl enágna wówapi iyóȟpeyapi wičhóȟ’aŋ óta kte. Wóštaŋpi k’uŋ hé úŋ, ȟupáhu čhatkáyataŋhaŋ oyáte óta épi na ȟupáhu išláyataŋhaŋ oyáte óta takómni wówapi iyóȟpeyapi kiŋ él íčat’a anúŋg ópȟapi kte. Čha nakúŋ lé Tȟuŋkášila Omníčiye kiŋ yutȟókeča kte séče. Lehíŋtagna, táku óta tȟókeča hiŋglá čha khilí.